ឧត្តរមានជ័យ:នារសៀលថ្ងៃទី២៨ ខែកញ្ញា ឆ្នាំ២០២៦ ឯកឧត្ដម មាន ចាន់យ៉ាដា អភិបាល នៃគណៈអភិបាលខេត្តឧត្ដរមានជ័យ បានដឹកនាំមន្ទីរជំនាញពាក់ព័ន្ធ និងអាជ្ញាធរមូលដ្ឋានចុះពិនិត្យដោយផ្ទាល់ចំពោះស្ថានភាពជំនន់ទឹកភ្លៀង ដែលបានហក់ឡើងខ្លាំង និងបង្កផលប៉ះពាល់ដល់ហេដ្ឋារចនាសម្ព័ន្ធផ្លូវថ្នល់មួយខ្សែ នៅចំណុចស្ពានទ័ព ស្ថិតក្នុងភូមិជើងទៀន ឃុំជើងទៀន ស្រុកចុងកាល់ ខេត្តឧត្តរមានជ័យ ព្រមទាំងបានដោះស្រាយទាន់ពេលវេលា ដើម្បីធានាបាននូវសុវត្ថិភាពជូនដល់ប្រជាពលរដ្ឋដែលត្រូវធ្វើដំណើរឆ្លងកាត់តំបន់នោះ។

ក្រោមការដឹកនាំដ៏ផ្ទាល់របស់ឯកឧត្ដម មាន ចាន់យ៉ាដា ក្រុមការងារបច្ចេកទេស មន្ទីរសាធារណការ និងដឹកជញ្ជូន រួមជាមួយអាជ្ញាធរស្រុកចុងកាល់ និងកម្លាំងពាក់ព័ន្ធទាំងអស់ បានសហការគ្នាយ៉ាងសកម្មក្នុងការដាក់ពង្រាយគ្រឿងចក្រ និងសម្ភារៈចាំបាច់នានា ដើម្បីរៀបចំជួសជុលជាបណ្តោះអាសន្ននូវចំណុចដែលរងការខូចខាត។ សកម្មភាពឆ្លើយតបយ៉ាងឆាប់រហ័សនេះ មិនត្រឹមតែជួយការពារកុំឱ្យផ្លូវត្រូវកាត់ផ្តាច់ទាំងស្រុងប៉ុណ្ណោះទេ ប៉ុន្តែថែមទាំងធានាបាននូវសុខសុវត្ថិភាពជូនអ្នកដំណើរ ព្រមទាំងសម្រួលដល់ការដឹកជញ្ជូនទំនិញ និងកសិផលផ្សេងៗរបស់ប្រជាពលរដ្ឋក្នុងតំបន់ឱ្យបន្តដំណើរការទៅមុខដោយរលូនផងដែរ។

ក្នុងការចុះអន្តរាគមន៍ផ្ទាល់នៅនឹងកន្លែងកើតហេតុនោះ ឯកឧត្ដមមាន ចាន់យ៉ាដា បានធ្វើការណែនាំដល់ក្រុមការងារបច្ចេកទេស និងអាជ្ញាធរមូលដ្ឋាន ឱ្យបន្តប្រុងប្រយ័ត្នខ្ពស់ និងប្រមូលផ្តុំកម្លាំងព្រមទាំងមធ្យោបាយសង្គ្រោះឱ្យបានរួចជាស្រេច ដើម្បីឆ្លើយតបចំពោះស្ថានភាពអាកាសធាតុដែលអាចនឹងមានការប្រែប្រួលបន្តទៀត។

ឯកឧត្ដម អភិបាលខេត្ត ក៏បានអំពាវនាវដល់បងប្អូនប្រជាពលរដ្ឋទាំងអស់ដែលរស់តំបន់ប្រឈមមុខនឹងជំនន់ទឹកភ្លៀង សូមបង្កើនស្មារតីប្រុងប្រយ័ត្នខ្ពស់បន្ថែមទៀតចំពោះស្ថានភាពទឹកជំនន់ ដែលអាចកើតមានឡើងជាយថាហេតុ ដោយសារតែរដូវកាលនេះមានភ្លៀងធ្លាក់ច្រើនផងដែរ៕ (ដោយឈឿន ប៊ុនឈី)